ගුවන් හමුදා සේවයේ යෙදී සිටියදී මියගිය රණවිරුවන් අනුස්මරණය කිරීමේ ක්‍රිස්තියානි ආගමික දේව මෙහෙය, අද (2016 අගෝස්තු මස 30 වන) දින සවස බොරැල්ල සියලූ ශාන්තුවරුන්ගේ කතෝලික දේවස්ථානයේදී පවත්වන ලදී.

ගුවන් හමුදාධීපති එයාර් මාර්ෂල් ගගන් බුලත්සිංහල මහතා, ගුවන් හමුදා අධ්‍යක්‍ෂක මණ්ඩලය, නිළධාරීන්, සෙසු නිළයන්, සිවිල් කාර්ය මණ්ඩල සාමාජික සාමාජිකාවන් සහ දේශයේ උන්නතිය වෙනුවෙන් දිවිපිදූ ගුවන් විරුවන්ගේ පවුල්වල සාමාජික සාමාජිකාවන් පිරිසක්ද මෙම අවස්ථාවට සහභාගී වූහ.

මෙම උත්සවය පස්වරු 4.00 ට පමණ ආරම්භ කරන ලදි අතර සියළුම ගුවන් හමුදා කඳවුරු නියෝජනය කරමින් එම කඳවුරු ඒකකයන්හි ධජයන් පූජාසනය වෙත රැගෙන ඒම සිදු කරන ලදී. අනතුරුව මාතෘභූමියේ ඒකීය භාවය වෙනුවෙන් තම ජීවිතය පූජා කරන ලද ගුවන් හමුදා විරුවන්ගේ නම් ඇතුළත් ලේඛනයක් විදහා දක්වමින් ඔවුන්ට ආශිර්වාද කිරීම සිදු කරන ලදී.