ගුවන් හමුදාපති එයාර් මාර්ෂල් උදේනි රාජපක්ෂ මහතාගේ මඟපෙන්වීම යටතේ ගුවන් හමුදා 73 වැනි සංවත්සරය සමගිමීව සංවිධානය කරන ලද ගුවන් හමුදාධිපති අභියෝග මිත්‍රත්ව පාපන්දු කුසලාන 2024 පෙබරවාරි මස 10 වන දින කිලිනොච්චියේ උතුරු පළාත් ක්‍රීඩා සංකීර්ණයේදී ආරම්භ විය. මෙම තරඟාවලියේ අරමුණ වූයේ දක්ෂතා ඇති තරුණ තරුණියන්ට තම කුසලතා ප්‍රදර්ශනය කිරීමට වේදිකාවක් සැලසීම සහ ජාතික හා ජාත්‍යන්තර තලයට ගෙන ඒම සදහා මග පෑදීම සඳහා වඩාත් දක්ෂතා ඇති තරුණයින් හඳුනාගැනීමයි.

ශ්‍රී ලංකා පාපන්දු සම්මේලනය යටතේ විධිමත් ලෙස ලියාපදිංචි වූ උතුරු පළාතේ පාපන්දු ලීග 11ක් අභියෝග කුසලානය සඳහා තරග වැදුණි.

තරඟාවලියේ මූලික වටයේ තරඟ ප්‍රධාන ක්‍රීඩාංගණ දෙකක් හරහා පැවැත්විණි. කිලිනොච්චිය උතුරු පළාත් ක්‍රීඩා සංකීර්ණය සහ උතුරු නාවික විධානයට අයත් කන්කසන්තුරේ බහු-ක්‍රීඩා පිටිය සහ අනතුරුව 2024 මාර්තු 06 වන දින යාපනයේ දොරේඅප්පා ක්‍රීඩාංගණයේදී අවසන් තරග පැවැත්වුණු අතර එහිදී මන්නාරම පාපන්දු ලීගය කිලිනොච්චි පාපන්දු ලීගයට එරෙහිව ක්‍රීඩා කළේය. ජයග්‍රාහී ලෙස නැගී සිටි මන්නාරම කණ්ඩායම කිලිනොච්චි කණ්ඩායමට එරෙහිව ගෝල 1-0ක් ලෙස හිමිකම් කීවේය.

මෙම අවස්ථාවට ප්‍රධාන ආරාධිත අමුත්තා ලෙස ගුවන් හමුදා මාණ්ඩලික ප්‍රධානී එයාර් වයිස් මාර්ෂල් සම්පත් වික්‍රමරත්න මහතා සහභාගී විය. තවද මෙම අවස්ථාව සඳහා ගුවන් හමුදා කළමනාකරණ මණ්ඩලයේ සාමාජිකයින්, ගුවන් හමුදා පාපන්දු සංචිත සභාපති එයාර් වයිස් මාර්ෂල් සුරේෂ් ප්‍රනාන්දු මහතා ඇතුළු යාපනයේ පාපන්දු ක්‍රීඩාවට ලැදි ක්‍රීඩකයින් ද සහභාගී විය.