'Air Tattoo 2024' අධ්‍යාපනික සහ තාක්ෂණික ප්‍රදර්ශනයේ තුන්වන දිනය 2024 මාර්තු 08 යාපනයේ මුට්‍රවේලි පිටියේදී ආරම්භ වූ අතර, ආරක්‍ෂක අමාත්‍යාංශයේ ලේකම් ජෙනරාල් කමල් ගුණරත්න (විශ්‍රාමික) ප්‍රධාන ආරාධිත අමුත්තා ලෙස සහභාගි වූයේ උත්සවයට කීර්තියක් එක් කරමිනි. ගුවන් හමුදාධිපති එයාර් මාර්ෂල් උදේනි රාජපක්ෂ මහතා විසින් ප්‍රධාන ආරාධිත අමුත්තා ඉතා උණුසුම් අයුරින් පිළිගන්නා ලදී.

ප්‍රදර්ශනය අතරතුර, ප්‍රධාන ආරාධිත අමුත්තා වෙත ගුවන් යානා සංරචක සහ අනෙකුත් අදාළ මාතෘකා පිළිබඳ කෙටි විස්තර ඉදිරිපත් කරමින් පාසල් සිසුන් තම උද්යෝගය විදහා දැක්වීය. ඊට අමතරව ජාතික ශිෂ්‍යභට බළකායේ ශිෂ්‍යභටයින් සහභාගී වී ඉදිරිපත්කරන ලද සරඹ සංදර්ශණයක් මගින් සිය දක්ෂතා එළිදැක්වූයේ ප්‍රදර්ශනයේ පළමු දිනයේ සිටම ප්‍රදර්ශන භූමියට විශාල ආකර්ෂණයක් එක් කරමිනි.

මෙම උත්සවයට හිටපු ගුවන් හමුදාපති එයාර් චීෆ් මාර්ෂල් ගගන් බුලත්සිංහල, යාපනය වාණිජ හා කර්මාන්ත මණ්ඩලයේ අධිපති ටී.වයි සුන්දරාසන් මහතා ඇතුළු ප්‍රවීනයන් මෙන්ම ගුවන් හමුදා මාණ්ඩලික ප්‍රධානී, ගුවන් හමුදා කළමනාකරණ මණ්ඩලය, ත්‍රිවිධ හමුදා නිලධාරීන්, ගම්පහ බණ්ඩාරනායක විද්‍යාලයේ විදුහල්පතිතුමා සහ අනෙකුත් සම්භාවනීය ආරාධිතයින් ඇතුළු විශාල පිරිසක් සහභාගී වූහ.