ඕස්ට්‍රේලියානු ආරක්ෂක සහ උපාය මාර්ගික අධ්‍යයන පාඨමාලාවේ නියෝජිත පිරිසක්‍ 2024 ඔක්තෝම්බර් 21 වන දින ශ්‍රී ලංකා ගුවන් හමුදා මූලස්ථානයේ සංචාරයක නිරත විය. කර්නල් ලාරා ටෙරේස් ට්‍රෝයිගේ ප්‍රධානත්වයෙන් සාමාජිකයින් 28 දෙනෙකුගෙන් සමන්විත දූත පිරිස ගුවන් හමුදාපතිවරයා වෙනුවෙන් මාණ්ඩලික ප්‍රධානී එයාර් වයිස් මාර්ෂල් සම්පත් වික්‍රමරත්න මහතා සමඟ සුහද හමුවක නිරත විය. මෙම හමුවේදී ඔවුන් අන්‍යෝන්‍ය වශයෙන් වැදගත් කරුණු සම්බන්ධයෙන් සුහද කතාබහක නිරත වූ අතර, එම අවස්ථාව සිහිපත් කිරීම සඳහා නිල සමරු ඵලක හුවමාරුවක්ද සිදු කරන ලදී. මෙම දූත පිරිස සමඟ ශ්‍රී ලංකාවේ ඔස්ට්‍රේලියානු ආරක්ෂක උපදේශක කර්නල් අමන්දා ජොන්ස්ටන් ද සහභාගී විය.

ශ්‍රී ලංකා ගුවන් හමුදාවේ සැලසුම් අධ්‍යක්ෂ මණ්ඩලයේ ධර්ම හා ප්‍රතිපත්ති සංවර්ධන අධ්‍යක්ෂ එයාර් කොමඩෝර් ප්‍රියමාල් ප්‍රනාන්දු විසින් 'ශ්‍රී ලංකා ගුවන් හමුදාවේ කාර්යභාරය සහ කාර්යය' පිළිබඳ ඉදිරිපත් කිරීමක් සිදු කරන ලදී. අන්තර්ක්‍රියාකාරී ප්‍රශ්නෝත්තර සැසියට ගුවන් හමුදා අධ්‍යක්ෂක මණ්ඩලයේ සාමාජිකයින් සහ ජ්‍යෙෂ්ඨ මාණ්ඩලික නිලධාරීන්ගේ සහභාගීත්වය ඇතුළත් විය.