ඇමරිකා එක්සත් ජනපදයේ මොන්ටානා ජාතික ආරක්ෂක බලකායේ ඇඩ්ජුටන්ට් ජෙනරාල් බ්‍රිගේඩියර් ජෙනරාල් ට්‍රෙන්ටන් ජේ. ගිබ්සන් මහතාගේ ප්‍රධානත්වයෙන් යුත් දූත පිරිසක් 2026 ඔක්තෝබර් මස 08 වන දින ගුවන් හමුදා මූලස්ථානය වෙත පැමිණ ශ්‍රී ලංකා ගුවන් හමුදාපති එයාර් මාර්ෂල් බන්දු එදිරිසිංහ මහතා හමුවිය.

මොරවැව ශ්‍රී ලංකා ගුවන් හමුදා කඳවුරේ පිහිටි විශේෂ බලකා රෙජිමේන්තු පුහුණු පාසල (RSFTS) විසින් 2026 සැප්තැම්බර් 07 සිට 2026 ඔක්තෝබර් 06 දක්වා 72 වන ක්ෂණික ප්‍රතිචාර කණ්ඩායම් පුහුණු පාඨමාලාව සාර්ථකව පවත්වන ලදී. මෙම පාඨමාලාව සඳහා ශ්‍රී ලංකා ගුවන් හමුදාවේ එක් නිලධාරියෙකු සහ බංග්ලාදේශ ගුවන් හමුදාවේ විදේශීය නිලධාරීන් දෙදෙනෙකු ඇතුළුව මෙහෙයුම් අංශයේ (Ops Grd) සාමාජිකයින් 31 දෙනෙකු සහභාගී විය.

ඉදිරියේදී පැවැත්වීමට නියමිත අනුස්මරණ දින සැමරුම්වලට සමගාමීව  ශ්‍රී ලංකා විශ්‍රාමික සන්නද්ධ හමුදා සාමාජිකයන්ගේ සංගමයේ (SLESA) පොපි කමිටු සභාපති විශ්‍රාමික මේජර් ජෙනරාල් මහින්ද මුදලිගේ මහතා විසින් 2026 ඔක්තෝබර් 07 වන දින ගුවන් හමුදා මූලස්ථානයේ පැවති උත්සවයකදී ශ්‍රී ලංකා ගුවන් හමුදාපති එයාර් මාර්ෂල් බන්දු එදිරිසිංහ මහතා වෙත නිල වශයෙන් පොපි මලක් පැළඳවන ලදී.