ශ්‍රී ලංකා ගුවන් හමුදා අනුරාධපුර කඳවුර සිය 42 වන සංවත්සරය 2024 නොවැම්බර් 09 දින සමරන ලදී. කඳවුර තුල සහ කඳවුරින් බැහැරව සුභසාධනය සඳහා වූ වැඩසටහන් මගින්  විධිමත් සහ ප්‍රජා මූලික සිදුවීම් මාලාවක් සිදු කරනු ලැබීය. කඳවුරු අණදෙන නිළධාරී ගෲප් කපිතාන් පූජන ගුණතිලක නිලධාරිතුමන්ගේ  ප්‍රධානත්වයෙන්  චාරිත්‍රානුකූල වැඩ පෙළපාලියකින් සැමරුම ආරම්භ විය. මෙම සුවිශේෂී අවස්ථාව සිහිකරමින්  ප්‍රාදේශීය ආයතන සහ ප්‍රජා යහපැවැත්ම වැඩිදියුණු කිරීම සඳහා විවිධ වූ වැඩසටහන් සිදු කරන ලදී. මේ අතරින් ඇහැටුවැව ශ්‍රී සම්බුද්ධ විහාරය, කදිරේෂන් කෝවිල සහ බෝනමුව පාසල ප්‍රතිසංස්කරණය කිරීම ද සිදු කරන ලදී. ප්‍රජා සෞඛ්‍ය සේවා සඳහා දායකත්වයක් ලෙස හදිසි ප්‍රතිකාර ලබා දීමේ හැකියාවට සහාය වෙමින් අනුරාධපුර ශික්ෂණ රෝහලට හුස්ම ගැනීම පහසු කිරීමේ යන්ත්‍ර(ventilators) පහක් පරිත්‍යාග කරන ලදී.

මීට අමතරව, ප්‍රාදේශීය ප්‍රජාව තුළ සහයෝගය ඉහළ නංවමින් 2024 ඔක්තෝම්බර් 24 වන දින මූලික රෝහලේදී ලේ දන්දීමේ වැඩසටහනක් සංවිධානය කරන ලදී. සංවත්සර දිනයේදී පාරිසරික තිරසාරත්වය වෙනුවෙන් රුක් රෝපණ වැඩසටහනක් පැවැත්විණි. කඳවුරේ සේවා සාමාජිකයින් සහ සිවිල් පුද්ගලයින්ගේ සහභාගීත්වයෙන් විවිධ ක්‍රීඩා ඉසව් රැසක් පැවැත්වීමෙන් පසුව. සියලුම නිලයන් සදහා වූ දිවා භෝජන සංග්‍රහයකින් සැමරුම් අවසන් විය.