ශ්‍රී ලංකා රසායනික අවි සම්මුතිය ක්‍රියාත්මක කිරීම සඳහා වූ ජාතික අධිකාරිය (NACWC) විසින් සංවිධානය කරන ලද සහාය සහ ආරක්ෂණ මූලික පාඨමාලාව කටුනායක ගුවන් හමුදා කඳවුරේ අංක 49 - රසායනික, ජීව විද්‍යාත්මක, විකිරණශීලී, න්‍යෂ්ටික සහ පුපුරණ ද්‍රව්‍ය පිළිබද  පක්ෂාංගයේදී (CBRNE) සාර්ථකව පවත්වන ලදී. මෙම වැඩසටහන 2025 ඔක්තෝබර් 13 වන දින ආරම්භ වූ අතර 2025 ඔක්තෝබර් 17 වන දින සාර්ථකව අවසන් විය.

ත්‍රිවිධ හමුදාව, විශේෂ කාර්ය සාධක බලකාය (STF), ශ්‍රී ලංකා වරාය ගිනි නිවන හමුදාව සහ කොළඹ ගිනි නිවන හමුදාව නියෝජනය කරමින් 20 දෙනෙකු සහභාගී විය. මෙම අවස්ථාවට සත්කාරකත්වය සැපයීමේ ගෞරවය අංක 49 රසායනික, ජීව විද්‍යාත්මක, විකිරණශීලී, න්‍යෂ්ටික සහ පුපුරණ ද්‍රව්‍ය පිළිබද   පක්ෂාංගයට හිමි විය. CBRNE ප්‍රතිචාර දැක්වීම සහ ආරක්ෂාව පිළිබඳ සහභාගිවන්නන්ගේ දැනුම සහ මෙහෙයුම් සූදානම වැඩි දියුණු කරමින් එම පක්ෂාංගයේ නිලධාරීන් පාඨමාලාව පුරා දේශන සහ ප්‍රායෝගික පුහුණු සැසි මාලාවක් පවත්වන ලදී.

සමාරම්භක උත්සවයට ශ්‍රී ලංකා රසායනික අවි සම්මුතිය ක්‍රියාත්මක කිරීම සඳහා වූ ජාතික අධිකාරි කාර්යාංශයේ අධ්‍යක්ෂ විසින් ආරම්භක දේශනය පැවැත්වන ලදී. එයාර් වයිස් මාර්ෂල් ෂෙහාන් විජේනායක මහතා ප්‍රධාන ආරාධිත අමුත්තා ලෙස සහභාගී විය. කටුනායක ගුවන් හමුදා කඳවුරේ අණදෙන නිලධාරී එයාර් කොමඩෝර් අසේල ජයසේකර මහතා ද මෙම අවස්ථාවට සහභාගී විය.

සමාප්ති උත්සවය එයාර් වයිස් මාර්ෂල් ෂෙහාන් විජේනායක මහතාගේ සහ කටුනායක ගුවන් හමුදා කඳවුරේ නියෝජ්‍ය කඳවුරු අණදෙන නිලධාරීතුමාගේ ප්‍රධානත්වයෙන් පැවැත්විණි.