හිඟුරක්ගොඩ ගුවන් හමුදා කඳවුරේ අංක 9 ප්‍රහාරක හෙලිකොප්ටර් බලඝණය සංවිධානය කරන ලද වාර්ෂික සර්ව රාත්‍රීක පිරිත් දේශනය සහ දානමය පුණ්‍යෝත්සවය 2025 නොවැම්බර් 06 සහ 07 යන දිනවල පැවැත්විණි. අංක 9 ප්‍රහාරක හෙලිකොප්ටර් බලඝණයේ සහ අංක 7 හෙලිකොප්ටර් බලඝණයේ සාමාජිකයින් එක්ව සංවිධානය කරන ලද මෙම අවස්ථාවට හිඟුරක්ගොඩ ගුවන් හමුදා කඳවුරේ සියලුම අංශවල සහයෝගය ලැබුණි. මව්බිම ආරක්ෂා කිරීම සඳහා උත්තරීතර කැපකිරීමක් කළ මියගිය රණවිරුවන් සැමරීම සහ ඔවුන්ට ආශිර්වාද කිරීම සඳහා ආගමික වතාවත් මාලාවක් පවත්වන ලදී.

උත්සවය වර්ණවත් පෙරහැරකින් ආරම්භ වූ අතර, හිඟුරක්ගොඩ ගුවන් හමුදා කඳවුරේ අණදෙන නිලධාරී එයාර් කොමඩෝර් දිනේෂ් ජයවීර නිළධාරීතුමන් විසින් පූජනීය කරඬුව අංක 9 ප්‍රහාරක හෙලිකොප්ටර් බලඝණයේ අංගනය වෙත රැගෙන ගොස්  අලංකාර කරන ලද පිරිත් මණ්ඩපයේ ගෞරවාන්විතව තැන්පත් කරන ලදී.

පිරිත් දේශනය රාත්‍රිය පුරා අඛණ්ඩව සිදු වූ අතර, 2025 නොවැම්බර් 07 වන දින ගුවන් හමුදා හිඟුරක්ගොඩ කඳවුරේ නිලධාරීන් සහ සෙසු නිලයන් මෙන්ම අංක 9 ප්‍රහාරක හෙලිකොප්ටර් බලඝණයේ සහ අංක 7 හෙලිකොප්ටර් බලඝණයේ මියගිය රණවිරුවන්ගේ පවුල්වල සාමාජිකයින්ගේ සහභාගීත්වයෙන් උදෑසන දානමය පිංකම පැවැත්විණි.

ඊට අමතරව, පිරිත් දේශනයට පෙර දිනවල අනෙකුත් ආගම්වල මියගිය රණවිරුවන් සඳහා ආගමික වතාවත් පවත්වන ලදී. ඉස්ලාමීය සහ කතෝලික ආගමික සේවාවන් පිළිවෙලින් 2025 නොවැම්බර් 01 සහ 2025 නොවැම්බර් 10 යන දිනවල ජුම්මා මස්ජිත් හතමුනේ පල්ලියේදී සහ හිඟුරක්ගොඩ ක්‍රිස්තු රජ පල්ලියේදී පවත්වන ලද අතර, එහිදී මියගිය රණවිරුවන් සිහිපත් කිරීම සඳහා යාඥා සහ ආශිර්වාද ලබා දෙන ලදී.