එයාර් වයිස් මාර්ෂල්  කේ.එම්.පී. හේවාපතිරණ

Eng, MBA, Pg Dip (Mkt Mgt), GCGI (SL), MITE (SL), I Eng, MIM (SL), MSLIM

එයාර් වයිස් මාර්ෂල් ක්‍රිෂාන්ත හේවාපතිරණ නිළධාරීතුමන් බලංගොඩ ආනන්ද මෛත්‍රෙය මධ්‍ය මහා විද්‍යාලයේ කීර්තිමත් ආදි ශිෂ්‍යයෙකි. ඔහු 1997 දෙසැම්බර් 08 වන දින ශ්‍රී ලංකා ගුවන් හමුදාවේ ඉදිකිරීම් ඉංජිනේරු ශාඛාවට එක්ව නියමු නිලධාරියෙකු ලෙස සිය හමුදා සේවය ආරම්භ කළ අතර, දියතලාව සටන් පුහුණු පාසලේ මූලික හමුදා පුහුණුව සාර්ථකව නිම කිරීමෙන් අනතුරුව චීන වරාය ගුවන් හමුදා විද්‍යාපීඨය වෙත අනුයුක්ත විය.

එයාර් වයිස් මාර්ෂල් ක්‍රිෂාන්ත හේවාපතිරණ නිළධාරීතුමන් ඉංජිනේරු විද්‍යාව, කළමනාකරණය සහ ව්‍යාපාර පරිපාලනය යන ක්ෂේත්‍රයන්හි ජාතික හා ජාත්‍යන්තර වෘත්තීය සහ පශ්චාත් උපාධි  රැසක් හිමිකරගෙන ඇත. එමෙන්ම නායකත්ව හා කළමනාකරණය, ජාත්‍යන්තර මානුෂීය නීතිය, තොරතුරු තාක්ෂණය සහ විශේෂිත ඉංජිනේරු ක්ෂේත්‍රයන් ආශ්‍රිත දේශීය හා විදේශීය පුහුණු පාඨමාලා රැසක් සාර්ථකව හදාරා ඇත.

ඔහුගේ ජාත්‍යන්තර වෘත්තීය අත්දැකීම් අතර ඉන්දියානු ගුවන් හමුදාවේ කනිෂ්ඨ අණදෙන නිලධාරී පාඨමාලාව, චීනයේ යන්ත්‍රෝපකරණ හා උපකරණ පුහුණු වැඩසටහන සහ එක්සත් ජනපද ගුවන් හමුදාවේ PACAF Silver Flag පුහුණු වැඩසටහන ඇතුළත් වේ.

වෘත්තීය සේවා කාලය තුළ ඉදිකිරීම්, යාන්ත්‍රික හා විදුලි ඉංජිනේරු ක්ෂේත්‍රයන්හි ප්‍රධාන පත්වීම් රැසක් දරා ඇති ඔහු, ශ්‍රී ලංකා ගුවන් හමුදා මූලස්ථානයේ ඉදිකිරීම් ඉංජිනේරු අධ්‍යක්ෂ මණ්ඩලයේ ජ්‍යෙෂ්ඨ පත්වීම් මෙන්ම කටුනායක ගුවන් හමුදා කඳවුරේ යාන්ත්‍රික හා විදුලි ඉංජිනේරු පක්ෂාංගයේ  අණදෙන නිලධාරී ලෙසද සේවය කර ඇත. තවද, චීන වරාය ගුවන් හමුදා විද්‍යාපීඨයේ වැඩ බලන අණදෙන නිලධාරී සහ වැඩ බලන ඉංජිනේරු නිලධාරී ඇතුළු තනතුරු රැසක් දරා ඇත.

ඔහුගේ කැපවීම, වෘත්තීයභාවය සහ කීර්තිමත් සේවය වෙනුවෙන් පූර්ණ භූමි පදක්කම, පළමු ක්ලාස් සමඟ උතුරු හා නැගෙනහිර මෙහෙයුම් පදක්කම, උතුරු මානුෂීය මෙහෙයුම් පදක්කම සහ සේවා පදක්කම ඇතුළු හමුදා පදක්කම් රැසකින් පිදුම් ලබා ඇත.

එයාර් වයිස් මාර්ෂල් ක්‍රිෂාන්ත හේවාපතිරණ මහතා ශ්‍රී ලංකා ඉන්කෝපරේටඩ් ඉංජිනේරු ආයතනයේ, ශ්‍රී ලංකා කළමනාකරණ ආයතනයේ සහ ශ්‍රී ලංකා අලෙවිකරණ ආයතනයේ වෘත්තීය සාමාජිකත්වයන් දරයි.

ඔහු ඩිලානි චමිලා මල්වැන්න මහත්මිය සමඟ විවාහ වී සිටින අතර, ඔවුන්ට මිනුලි දියණිය සහ මනුක පුතණුවන් යන දරුවන් දෙදෙනෙකු සිටී.