එයාර් වයිස් මාර්ෂල් සී ජේ හෙට්ටිආරච්චි

USP,MSc(Def Stu)Mgt, MDS, BSc(Def Stu) Aero Eng, AMIE(SL), MCMET(SL), psc  

එයාර් වයිස් මාර්ෂල් චන්දිමාල් හෙට්ටිආරච්චි  1972 මැයි 12 වන දින මාතරදී උපත ලැබීය. බී/කොස්ලන්ද මහා විද්‍යාලයෙන් සහ කොළඹ තර්ස්ටන් විද්‍යාලයෙන් අධ්‍යාපනය ලැබූ එතුමා, 1993 ඔක්තෝබර් 17 වන දින ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලයේ  11 වන බඳවා ගැනීමේ කණ්ඩායමට කැඩෙට් නිලධාරියෙකු ලෙස එක් වූ අතර 1996 ඔක්තෝබර් 17 වන දින තාක්ෂණික ඉංජිනේරු ශාඛාවේ පියාසර නිලධාරියෙකු ලෙස ශ්‍රී ලංකා ගුවන් හමුදාවේ  අධිකාරියට පත් විය.

11 වන බඳවා ගැනීමේ කණ්ඩායමේ කුසලතා අනුපිළිවෙලින් ප්‍රථම ස්ථානය හිමිකරගත් එතුමා, ගුවන් යානා ඉංජිනේරු විද්‍යාව, තාක්ෂණික විෂය ධාරාව, හමුදා අධ්‍යයනය සහ හොඳම ශිෂ්‍ය නිලධාරියා සඳහා වූ සම්මාන හිමිකර ගත්තේය.

සිය සේවා කාලය තුළ අංක 05 ජෙට් බලඝණයේ ඉංජිනේරු නිලධාරී, අංක 06 හෙලිකොප්ටර් බලඝණයේ නඩත්තු නියෝජ්‍ය අණදෙන නිලධාරී, අංක 14 උසස් පියාසර පුහුණු පක්ෂාංගයේ  නඩත්තු අණදෙන නිලධාරී, අංක 01 පියාසර පුහුණු පක්ෂාංගයේ නඩත්තු අණදෙන නිලධාරී, ඒකල ගුවන් හමුදා වෘත්තීය පුහුණු පාසලේ අණදෙන නිලධාරී සහ කොතලාවල ආරක්ෂක විශ්වවිද්‍යාලයේ ගුවන් ඉංජිනේරු දෙපාර්තමේන්තු ප්‍රධානී ඇතුළු තනතුරු රැසක් හොබවා ඇත.

ගුවන් හමුදා මූලස්ථානයේදී පර්යේෂණ හා සංවර්ධන අධ්‍යක්ෂ, ගුවන් යානා භූමි සහාය හා අවි අධ්‍යක්ෂ, තත්ත්ව සහතික අධ්‍යක්ෂ, ගුවන් ඉංජිනේරු අධ්‍යක්ෂ ඇතුළු වැදගත් මාණ්ඩලික හා අණදෙන නිළධාරී ලෙස තනතුරු රැසක් හොබවා ඇති එතුමා, ගුවන් හමුදාවේ තාක්ෂණික පුහුණුව, පර්යේෂණ හා සංවර්ධනය, ඉංජිනේරු සහාය සහ මෙහෙයුම් හැකියාවන් වර්ධනය කිරීම සඳහා සැලකිය යුතු දායකත්වයක් ලබා දී ඇත.

එයාර් වයිස් මාර්ෂල් චන්දිමාල් හෙට්ටිආරච්චි නිළධාරීතුමන්  ගුවන් යානා ඉංජිනේරු විද්‍යාව හා ආරක්ෂක අධ්‍යයන ක්ෂේත්‍රයන්හි පශ්චාත් උපාධි ඇතුළු දේශීය හා විදේශීය වෘත්තීය හා හමුදා පාඨමාලා රැසක් සම්පූර්ණ කර ඇති අතර, ශ්‍රී ලංකා ගුවන් හමුදාවේ ක්‍රීඩා ක්ෂේත්‍රයේ සංවර්ධනයටද දායක වී ඇත.

එයාර් වයිස් මාර්ෂල් චන්දිමාල් හෙට්ටිආරච්චි මහතා උපාධිධාරිනියක සහ ඉංග්‍රීසි ගුරුවරියක වන ධනුෂ්කා සුරවීර මහත්මිය සමඟ විවාහ වී සිටී.