එයාර් වයිස් මාර්ෂල් පාලිත බාලසූරිය 1988 මැයි 17 වන දින ශ්‍රී ලංකා ගුවන් හමුදාවට කැඩෙට් නිලධාරියෙකු ලෙස සම්බන්ධ වූ අතර 1989 වර්ෂයේ ඉලෙක්ට්‍රොනික ඉංජිනේරු ශාඛාවේ නියමු නිලධාරියෙකු ලෙස පත් කරන ලදී. ඔහුගේ පුහුණු කාලය තුළ ඔහු මූලික අධ්‍යාපනය සාර්ථකව නිම කර ඇත. දියතලාව ගුවන් හමුදා සටන් පුහුණු පාසලේ සටන් පුහුණුව, චීන වරාය ගුවන් හමුදා ඇකඩමියේ මූලික පරිපාලනය සහ ශාඛා පුහුණු පාඨමාලා හදාරා ඇත. ඔහු චීනවරාය ගුවන් හමුදා විද්‍යාපීඨයේ කනිෂ්ඨ අණ හා මාණ්ඩලික විද්‍යාලයේ කනිෂ්ඨ අණ හා මාණ්ඩලික පාඨමාලාව හදාරා ඇති අතර ජෙනරාල් ශ්‍රීමත් කොතලාවල ආරක්ෂක විශ්වවිද්‍යාලයෙන් ආරක්‍ෂක කළමනාකරණය පිළිබඳ ශාස්ත්‍රපති උපාධියක් සහ ආරක්‍ෂක කළමනාකරණය පිළිබඳ ශාස්ත්‍රවේදී උපාධියක් ලබා හොඳ අධ්‍යයන පසුබිමක් සහිතව සුදුසුකම් ලබා ඇත.

එයාර් වයිස් මාර්ෂල් බාලසූරිය මහතා ගුවන්විදුලි සන්නිවේදන, විදුලි සංදේශ, රේඩාර් සහ ගුවන් විද්‍යාව යන ක්ෂේත්‍රවල විශේෂීකරණය ඇතුළත් ඉලෙක්ට්‍රොනික ඉංජිනේරු ශාඛාවේ පුළුල් පරාසයක අත්දැකීම් ලබා ඇත. ඔහුගේ කීර්තිමත් සේවා කාලය තුළ ඔහු ශ්‍රී ලංකා ගුවන් හමුදාවේ විවිධ ආයතන රැසක සේවය කර ඇති අතර, ශ්‍රී ලංකාවේ ජාතික ගුවන් ආරක්ෂක පද්ධතිය පිහිටුවීමේ පුරෝගාමී සාමාජිකයෙකු වෙමින්, ගුවන් යානා කම්බි පටි නිෂ්පාදනය කිරීමේ පහසුකම හඳුන්වාදීම සහ ස්ථාපිත කිරීමේ ගෞරවය හිමිකරගෙන ඇත.

 ඔහු ගුවන් නිරීක්ෂණ නිලධාරියෙකු ලෙසද සුදුසුකම් ලබා ඇත. එයාර් වයිස් මාර්ෂල් බාලසූරිය මහතා විසින් ඉලෙක්ට්‍රොනික හා විදුලි සංදේශ ඉංජිනේරු අධ්‍යක්ෂවරයා ලෙස වැඩ භාර ගැනීමට පෙර ශ්‍රී ලංකා ගුවන් හමුදාවේ අණදෙන පර්යේෂණ හා සංවර්ධන නිලධාරියා ලෙස පත් කරන ලදී.

ඔහුගේ විශිෂ්ඨ සහ ආදර්ශමත් සේවය වෙනුවෙන් ඔහු ශ්‍රී ලංකා සන්නද්ධ සේවා දිගු සේවා පදක්කම සහ "උත්තම සේවා පදක්කම" යන පදක්කම් වලින් පිදුම් ලබා ඇත.