ගුවන් මිතුදම් ව්‍යාපෘතියේ 57 වැනි අදියර මොරටුවේදී සාර්ථකව අවසන් වේ
ගුවන් හමුදා සේවා වනිතා ඒකකයේ සභාපතිනී චාමිණි පතිරණ මහත්මියගේ මගපෙන්වීම යටතේ ගුවන් හමුදා රත්මලාන කඳවුර විසින් මොරටුව සාලිනා විද්‍යාලයේ දී ගුවන් මිතුදම් ව්‍යාපෘතියේ 57 වන අදියර 2023 ජුනි 28 වන දින සාර්ථකව අවසන් කරන ලදී.
රත්මලාන ගුවන් හමුදා කඳවුරේ සේවා වනිතා ඒකකය විසින් පාසලේ නව වැසිකිළි පහසුකම් ස්ථාපිත කරන ලදී. ව්‍යාපෘතිය අවසන් කිරීමෙන් පසු එය ගුවන් හමුදා රත්මලාන කඳවුරේ ගුවන් හමුදා කෞතුකාගාරයේ අණදෙන නිලධාරී එයාර් කොමදෝරු චරිත් බෝධිසීල විසින් සාලිනා විද්‍යාලයේ විදුහල්පති වෙත භාර දෙන ලදී. මීට අමතරව, උත්සවය අතරතුරදී සිසුන්ට ලිපි ද්‍රව්‍ය තිළිණ කරන ලදී.
මෙම ව්‍යාපෘතිය සඳහා අරමුදල් සපයනු ලැබුවේ ගුවන් හමුදා සේවා වනිතා ඒකකය සහ ගුවන් හමුදා රත්මලාන කඳවුර විසිනි. මෙම උත්සවය සඳහා රත්මලාන ගුවන් හමුදා කඳවුරේ නිලධාරීන් සහ සෙසු නිලයින් පිරිසක් මෙන්ම විද්‍යාලයේ සිසුසිසුවියන් සහ ගුරුවරුන් සහභාගී වූහ.
