2023 අන්තර් ඒකක නෙට්බෝල් ශූරතාවලියේ අවසන් මහා තරග 2023 ජූලි 20 කොළඹ ශ්‍රී ලංකා ගුවන් හමුදා සෞඛ්‍ය කළමනාකරණ මධ්‍යස්ථානයේදී පැවැත්විණි. ගුවන් හමුදා සේවා වනිතා ඒකකයේ සභාපතිනි ඉනෝකා රාජපක්ෂ මහත්මිය අවසන් මහා තරගයේ සහ සම්මාන ප්‍රදානෝත්සවයේ ප්‍රධාන ආරාධිත අමුත්තා ලෙස සහභාගී විය. ගුවන් හමුදා දැල්පන්දු සභාපති එයාර් කොමඩෝර් සුරේකා ඩයස්, රත්මලාන ගුවන් හමුදා කඳවුරු අණදෙන නිළධාරී එයාර් කොමඩෝර් අමල් පෙරේරා, කොළඹ ගුවන් හමුදා කඳවුරු අණදෙන නිළධාරී එයාර් කොමඩෝර් සුරේෂ් ප්‍රනාන්දු සහ ගුවන් හමුදා ක්‍රීඩා කවුන්සිලයේ සාමාජිකයින් අවසන් තරඟය නැරඹීම සඳහා සහභාගී විය.

 ගුවන් හමුදා රත්මලාන කඳවුර 2023 අන්තර් ඒකක නෙට්බෝල් ශූරතාවලියේ අවසන් මහා තරගයේදී ලකුණු 27-09 කින් චීනවරාය කදවුර පරදවමින් ශූරතාව දිනා ගැනීමට සමත් විය. ගුවන් හමුදා රත්මලාන කඳවුර නියෝජනය කළ ෆ්ලයිට් ලෙෆ්ටිනන්ට් නිමේෂා සතරසිංහ දක්‍ෂතම ආරක්‍ෂක ක්‍රීඩිකාව ලෙස සම්මාන ලැබූ අතර නායක ගුවන් කාන්තා  හේරත් එච්.එම්.එම්.කේ. ක්‍රීඩිකාව දක්ෂතම ගෝල විදින්නිය ලෙස සම්මාන ලැබීය. දක්ෂතම සෙන්ටර් කෝට් ක්‍රීඩිකාව ලෙස රත්මලාන ගුවන් හමුදා කඳවුරේ ෆ්ලයිට් ලෙෆ්ටිනන්ට් මනුෂි ද සිල්වා සම්මාන දිනා ගන්නා ලදි. තවද, 2023 අන්තර් ඒකක දැල්පන්දු ශූරතාවලියේ දැල්පන්දු රැජින ලෙස ශ්‍රී ලංකා ගුවන් හමුදා රත්මලාන කඳවුරේ ෆ්ලයිට් ලෙෆ්ටිනන්ට් වින්මා රත්නසූරිය කිරුළු පැළඳුවාය.