අංක 01 සැපයුම් හා නඩත්තු ඩිපෝව 72 වැනි සංවත්සරය සමරනු ලබයි
කටුනායක ගුවන් හමුදා කඳවුරේ අංක 01 සැපයුම් හා නඩත්තු ඩිපෝව 2023 සැප්තැම්බර් 04 වන දින සිය 72 වන සංවත්සරය සමරන ලදී. සම්ප්‍රදායික වැඩ පෙළපාලියෙන් දින සැමරුම ආරම්භ වූ අතර අණදෙන නිලධාරී ගෲප් කැප්ටන් එන් පී මෙරගලගේ නිළධාරීතුමන් විසින් ඩිපෝවේ සියලුම නිලධාරීන්, සෙසු නිලයින් සහ සිවිල් කාර්ය මණ්ඩලය ඇමතන ලදී.
සංවත්සර උත්සවයේ ප්‍රධාන ආරාධිත අමුත්තා ලෙස සැපයුම් අධ්‍යක්ෂ ජනරාල් එයාර් වයිස් මාර්ෂල් ආර්.එන්.තිලකසිංහ මහතා සහභාගි වූ අතර, සංවත්සර උත්සවයට සමගාමීව උදෑසන ඩිපෝ සම්මන්ත්‍රණ ශාලාවේදී ධර්ම දේශනා වැඩසටහනක් පැවැත්විණි.
තවද, අණදෙන නිළධාරීතුමාගේ මගපෙන්වීමකට අනුව අංක 01 සැපයුම් හා නඩත්තු ඩිපෝවේ සියලුම සාමාජිකයින්ගේ දායකත්වයෙන් එදිනම ඇවරියවත්ත "ලක්ෂ්මි" ළමා නිවාසයේ පුණ්‍ය වැඩසටහනක් පවත්වන ලදී. තවද ක්‍රීඩා උපකරණ සහ ඇඳ ඇතිරිලි පරිත්‍යාග කළ අතර ළමුන් සඳහා රාත්‍රී ආහාරය ද පිරිනැමීමෙන් අනතුරුව දින සැමරුම අවසන් විය.
