‘ගුවන් හමුදා පාපැදි සවාරිය 2024’ පිරිමි තරගයේ දින පහක ප්‍රයත්නය වන අවසන් සහ පස්වන අදියර 2024 මාර්තු 07 වන දින කිලෝමීටර් 147.4ක දුරක් ගෙවා ප්‍රසිද්ධ නගරයක් වන යාපනයේදී අවසන් විය. වවුනියාවේ සිට යාපනය දක්වා මෙම තරගය පැවැත්වුනු අතර පස්වැනි අදියරේ පළමු ස්ථානය ශ්‍රී ලංකා පොලිසියේ ෂෙහාල් චමෝද් හිමිකරගත් අතර ඉන්දීය ගුවන් හමුදාවේ ක්‍රිෂ්ණ නායකකොඩි සහ ශ්‍රී ලංකා යුද හමුදාවේ පසිඳු තිසේරා පිළිවෙලින් දෙවැනි සහ තෙවැනි ස්ථාන හිමිකරගන්නා ලදී.

ඊට සමගාමීව පැවත් කාන්තා ධාවන තරගය එදිනම සිය මංගල ගමන ආරම්භ කර මාන්කුලම් නගරයෙන් පිටත්ව කිලෝමීටර් 98ක දුරක් ගෙවා යාපනයෙන් අවසන් විය. ශ්‍රී ලංකා නාවික හමුදාවේ පාපැදි ක්‍රීඩිකා ඈන් ෂෙනාලි පෙරේරා ප්‍රථම ස්ථානයට හිමිකම් කීවාය. ශ්‍රී ලංකා ගුවන් හමුදාව නියෝජනය කරමින් දිනේෂා දිල්රුක්ෂි ප්‍රශංසනීය දස්කම් දක්වමින් දෙවැනි ස්ථානය හිමිකර ගත් අතර, කාන්තා තරගයට විශිෂ්ට නිමාවක් එක් කරමින් ශ්‍රී ලංකා යුද හමුදාවේ මදුමාලි ප්‍රනාන්දු තෙවැනි ස්ථානයට පත්විය.

මෙම සම්මාන ප්‍රදානෝත්සවය එදින සන්ධ්‍යාවේ යාපනය - මුට්ට්‍රවේලි ක්‍රීඩාංගන පරිශ්‍රයේදී ගුවන් හමුදාපති එයාර් මාර්ෂල් උදේනි රාජපක්ෂ මහතාගේ ප්‍රධානත්වයෙන් පැවැත්වීණි.