විශේෂ ප්‍රජා සේවා ව්‍යාපෘතිය මොරවැව උතුරු සිංහල විද්‍යාලයේ දී අවසන් වේ
ශ්‍රී ලංකා ගුවන් හමුදාවේ 73 වැනි සංවත්සරයට සමගාමීව සහ ශ්‍රී ලංකා ගුවන් හමුදාව සහ “පිරුණු කුසක් පිරුණු හිසක්” පුණ්‍යායතනය සමඟ එක්ව, අලුතින් ඉදිකරන ලද ප්‍රධාන පන්තිකාමරය සහ පරිගණක ඇතුලත් මොරවැව උතුරු සිංහල විද්‍යාලයේ ඉගෙනුම ලබන සිසුන්ගේ අධ්‍යාපනික අත්දැකීම් වැඩිදියුණු කිරීමේ අරමුණින් විද්‍යා රසායනාගාර ගොඩනැගිල්ල භාරදීම සඳහා විවෘත කිරීමේ උත්සවය 2024 මාර්තු 11 වන දින පැවැත්විණි.
ගුවන් හමුදාධිපති එයාර් මාර්ෂල් උදේනි රාජපක්ෂ, ගුවන් හමුදා මොරවැව කදවුරේ අණදෙන නිළධාරී ගෲප් කැප්ටන් හේමන්ත බාලසූරිය, වෛද්‍ය කිලෝෂිනී හෙන්දාවිතාරණ යන මහත්ම මහත්මීන් ඇතුළු නියෝජිතයින්ගේ සහභාගීත්වයෙන් මෙම සමාරම්භක උත්සවය ආරම්භ වූයේ සමරු ඵලකය නිරාවරණය කරමිනි.
මෙම ප්‍රජා සේවා ව්‍යාපෘතිය ශ්‍රී ලංකාවේ උතුරු මැද පලාතේ පාසල් ළමුන් සඳහා පාසල් දිවා ආහාරය සහ අනෙකුත් සමාජ/අධ්‍යාපනික ආධාර වැඩසටහන් සඳහා ප්‍රකට පුණ්‍යායතනයක් වන “පිරුණු කුසක් පිරුණු හිසක්” සහ ශ්‍රී ලංකා ගුවන් හමුදාව සදග එක්ව නිම කරන ලදී. තවද, මෙම ව්‍යාපෘතිය ආරම්භයේ සිට අවසන් කිරීම දක්වා කලාප අධ්‍යාපන අධ්‍යක්ෂ (ත්‍රිකුණාමලය උතුර) සහ නැගෙනහිර පළාත් අධ්‍යාපන ලේකම් විසින් පරිපාලන විධිවිධාන සම්බන්ධයෙන් නොසැලෙන සහයෝගය ලබා දෙන ලදී. "ගුවන් මිතුදම්" යන තේමාව යටතේ ශ්‍රී ලංකා ගුවන් හමුදාධිපතිතුමාගේ අනුමැතිය සහ ගුවන් හමුදා සේවා වනිතා ඒකකයේ අධීක්ෂණය යටතේ මෙම ව්‍යාපෘතිය ඉදිකිරීම සඳහා ශ්‍රී ලංකා ගුවන් හමුදාව විසින් කළමනාකරණය, ඉංජිනේරු සහ ශ්‍රම සේවාවන්හි සම්පූර්ණ දායකත්වය නොමිලේ ලබා දෙන ලදී.
මෙම උත්සවය සඳහා මොරවැව ගුවන් හමුදා කඳවුරේ නිලධාරීන් සහ සෙසු නිලයින්, විදුහල්පතිවරුන්, ගුරුවරුන්, සිසුන් සහ දෙමාපියන් ඇතුළු මොරවැව ප්‍රදේශයේ පාසල්වල නියෝජිතයින් පිරිසක් සහභාගී වූහ.
