ගුවන් හමුදා සේවා වනිතා ඒකකය, හේමාස් හෝල්ඩිංග්ස් පීඑල්සී හි ෆෙමිස් කණ්ඩායම සමඟ එක්ව හිඟුරක්ගොඩ ප්‍රදේශයේ අඩු ආදායම්ලාභී පවුල්වල පාසල් සිසුවියන් සඳහා සනීපාරක්ෂාව පිළිබඳ දැනුවත් කිරීම සහ දැනුම ලබා දීමේ අරමුණින් වැඩමුළුවක් සංවිධානය කරන ලදී. මෙම වැඩසටහන ඊයේ 2024 මාර්තු 13 වන දින දින ගුවන් හමුදා සේවා වනිතා ඒකකයේ සභාපතිනි ඉනෝකා රාජපක්ෂ මහත්මිය සහ සේවා වනිතා ඒකකයේ ජ්‍යෙෂ්ඨ සාමාජිකයින්ගේ සහභාගීත්වයෙන් හිඟුරක්ගොඩ විජයපුර මහා විද්‍යාලයේදී සහ අඹගස්වැව මහා විද්‍යාලයේදී පැවැත්විණි. උතුරුමැද පළාතේ ප්‍රාදේශීය අධ්‍යාපන අධ්‍යක්ෂ සහ ප්‍රධාන සංඝනායක පූජ්‍ය සිරිකෙත සිරි සීවලී හිමියන් විසින් මෙම උත්සවය සම්බන්ධීකරණ කටයුතු කළහ.

පාසල් පහක පාසල් සිසුවියන් 800 කට අධික පිරිසක් මෙම වැඩසටහනට එක්ව සිටි අතර, ඔවුන් වෙත නොමසුරුව සනීපාරක්ෂක ද්‍රව්‍ය පරිත්‍යාග කිරීම "හුස්ම" සැලැස්ම හරහා පහසුකම් සපයන ෂෙහානි පියසේන මහත්මියගේ කාරුණික සහයෝගය ඇතිව සිදු කරන ලදී. ගුවන් හමුදා හිඟුරක්ගොඩ කඳවුරු අණදෙන නිළධාරී එයාර් කොමදෝරු දිනේෂ් ජයවීර, ගුවන් හමුදා හිඟුරක්ගොඩ කදවුරේ සේවා වනිතා ඒකකයේ සභාපති ඩිලානි සුරේකා ජයවීර මහත්මිය, ගුවන් හමුදා සේවා වනිතා ඒකකයේ සාමාජිකයින් මෙන්ම විදුහල්පතිවරුන්, ගුරුවරුන් සහ සිසුන් ද මෙම අවස්ථාවට සහභාගී විය. .