2024 සැප්තැම්බර් 29 සිට ඔක්තෝබර් 04 දක්වා මධ්‍යම අප්‍රිකානු ජනරජයේ MINUSCA හි ශ්‍රී ලංකා ගුවන් සේවා ඒකකයේ උසස් අධීක්ෂණ චාරිකාවක් පවත්වන ලදී. මෙම දූත පිරිස ශ්‍රී ලංකා ගුවන් හමුදාවේ භූමි මෙහෙයුම් අධ්‍යක්ෂ ජනරාල් එයාර් වයිස් මාර්ෂල් චමින්ද වික්‍රමරත්න සහ ගුවන් හමුදාවේ අධ්‍යක්ෂ සැපයුම් හා සේවා ගෲප් කපිතාන් කපිල සිල්වා විසින් මෙහෙයවන ලදී. මෙම සංචාරයේ අරමුණ වූයේ යොදවා ඇති වත්කම් පිළිබඳ සවිස්තරාත්මක පරීක්‍ෂණයක් සිදු කිරීම සහ ශ්‍රී ලංකා ගුවන් සේවා බළකායේ අඛණ්ඩ ස්වයංපෝෂිතභාවය සහ මෙහෙයුම් සූදානම සහතික කිරීම සඳහා තවදුරටත් අවශ්‍ය සහාය සහ ක්‍රියාමාර්ග සොයා ගැනීමයි. දූත පිරිස පිළිගනු ලැබුවේ ශ්‍රී ලංකා ගුවන් සේවා අණදෙන නිලධාරී ගෲප් කපිතාන් අසංක රත්නායක විසිනි.

දූත පිරිස බ්‍රියා හි රැඳී සිටින අතරතුර සියලුම නිලයන් හට ඔවුන්ගේ ගැටළු සහ යෝජනා අධ්‍යක්ෂ ජනරාල් භූමි මෙහෙයුම් වෙත ප්‍රකාශ කිරීමට ඉඩ සැලසීම සඳහා සුභසාධන සමුළුවක් කැඳවන ලදී. දූත පිරිස අන්‍යෝන්‍ය වශයෙන් වැදගත් කරුණු සාකච්ඡා කිරීම සඳහා නැගෙනහිර අංශයේ සහ බලකා මූලස්ථානයේ හමුදා සහ සිවිල් නායකත්වයන්ගෙන්ද අදහස් ලබා ගත්හ. ඒ අනුව මෙම කණ්ඩායමට බලසේනාධිපති ලුතිනන් ජෙනරාල් හම්ෆ්‍රි නයෝන් නියෝජ්‍ය බලසේනාපති මේජර් ජෙනරාල් ලුයිස් මොන්සැන්ටෝ සහ බලකා මාණ්ඩලික ප්‍රධානී බ්‍රිගේඩියර් ජෙනරාල් සයිමන් එන්ඩෝර් හමුවීමට අවස්ථාව හිමි විය. සංචාරය 2024 ඔක්තෝබර් 04 දින සාර්ථකව අවසන් විය.